BØMLO: I dag har me strauma ein «fullskala» TV-produksjon direkte på YouTube frå Gullvegen Gardstun for Statsforvaltaren i Vestland.

Me produserte sendinga på direkten, med studio i Karoline-stova på tunet, med ein rekkje integrerte, ferdiginnspelte innslag. Eit av dei var verdspremiera på Inn på tunet-filmen me laga i august.

Det er fint å sjå korleis deltakarane i introduksjonsprogrammet til Bømlo kommune vert tekne i mot av Sindre Larsen og dei andre på Gullvegen Gardstun. Dei er innvandrarar med fluktbakgrunn og har masse arbeidserfaring, men lite formalkompetanse. I Inn på tunet-programmet til Statsforvaltaren i Vestland får dei arbeids- og språktrening og betre forståing av korleis norsk arbeidsliv fungerer.

Under konferansen 10. november hadde me i Vestland Media ansvaret for å strauma direkte på YouTube til eit nasjonalt publikum. I studiosendinga leia av Ragna Flotve frå Statsforvaltaren fekk me mellom andre høyra korleis ein av deltakarane allereie hadde fått seg jobb hos ein lokal bedrift på Bømlo.